CLÁR FORBARTHA GEARRSCANNÁN FAISNÉISE GAEILGE

TREOIRLÍNTE

Tionscnamh de chuid Docs Ireland, i gcomhar le Féile Idirnáisiúnta Scannán Chorcaí, le tacaíocht ó An Roinn Gnóthaí  Eachtracha agus Trádála – Chiste na nOileán Roinnte, TG4, BBC Thuaisceart Éireann, Ciste Craoltóireachta Gaeilge Scáileán Thuaisceart Éireann, agus Fís Éireann.

  1. Is é is Lasair ann ná clár le gearrscannáin faisnéise ardchaighdeáin, scéaldírithe, a fhorbairt i nGaeilge. Tá an scéim oscailte do scannánóirí ag gach céim dá ngairmréim, ó thallann a bheadh ag teacht chun cinn go dtí scannánóirí seanbhunaithe. 
  2. Tá an scéim bunaithe ar thionscadail. Is féidir tionscadail a bheith ag céim an choinceapa nó ag céim luath forbartha. Is é is aidhm le Lasair ná smaointe neamhfhicsin a fhorbairt ina dtionscadail láidre mhionsonraithe forbartha, réidh lena léiriú i nGaeilge. 
  3. Roghnófar suas le deich dtionscadal san iomlán. Ag deireadh an chláir oiliúna, déanfaidh lucht gach tionscadail cur i láthair d’fhonn deis a fháil teacht i dtír ar mhaoiniú léiriúcháin dá scannán.
  4. Ní mór gur i nGaeilge, go príomha, a bheadh aon scannán a léireofar.  
  5. Cuirfear fáilte roimh iarratais ó fhoirne stiúrthóir/léiritheoir, stiúrthóir/scríbhneoir, comhstiúrthóir agus stiúrthóir aonair. Ní mór ainm gach baill foirne, sa ról atá beartaithe dó nó di, a bheith luaite roimhe seo le haon chlár faisnéise amháin, ar a laghad (clár gairid, meánfhaid nó fada). Ní mór go mbeadh líofacht láidir sa Ghaeilge ag ball foirne amháin, ar a laghad.
  6. Breithneofar ar chláir ghairide den uile sheánra, den uile inneachar téamach agus ar gach ábhar agus tabharfar tús áite do chláir faisnéise a mbeadh cur chuige soiléir cineamatach ag baint leo, mar aon le tarraingt idirnáisiúnta.
    Chun críche na scéime, beidh muid ag breithniú ar thionscadail dar fad 40 bomaite nó níos lú.
  7. Ba cheart tionscadail a bheith ag céim an choincheapa nó ag céim luath forbartha. Is buntáiste é taighde a bheith déanta ar an ábhar, agus ní mór bealach soiléir le rochtain a fháil ar rannpháirtithe ar scáileán, ábhar cartlainne agus ábhar eile a léiriú i d’iarratas. 
  8. Glacfar le hiarratais iolracha ach ní féidir ach iarratas amháin in aghaidh an duine a roghnú don chlár.
  9. Cuirfear fáilte roimh thionscadail a mbeadh téama trasteorann ag baint leo.
  10. Tá na hiarratais oscailte do scannánóirí atá lonnaithe ar oileán na hÉireann.  
  11. Ní bheidh mic léinn lánaimseartha incháilithe don chlár oiliúna.
  12. Déanfar iarratais a mheas ar úrnuacht agus ar neart cruthaitheach an tionscadail, agus ar theist chruthaitheach na n-iarratasóirí. Déanfaidh muid achan iarracht cothroime inscne agus ionadaíocht chomhionann ó Phoblacht na hÉireann agus ó Thuaisceart Éireann a bhaint amach sa roghnú deiridh don chlár seo.  
  13. Is é an spriocdháta le tionscadail Lasair a chur isteach ná Dé hAoine, an 10ú Aibreán ar 5pm. Tá an fhoirm iarratais don scéim ar fáil ar ár suíomh idirlín, i mBéarla agus i nGaeilge. Beidh muid ag glacadh le hiarratais go príomha tríd an fhoirm iarratais, ach dá mb’fhearr leat cur i láthair físe a chur isteach mar iarratas, iarrtar ort teagmháil a dhéanamh le roisin@docsireland.ie chun leis seo a eagrú.
  14. Reáchtálfar an clár oiliúna thar na dátaí seo a leanas in 2026:
  • Bealtaine 2026: Lá Oiliúna Lasair ar líne 1 – Ar líne
  • 17-20 Meitheamh 2026: Laethanta oiliúna ar an láthair ag Docs Ireland – Lár Chathair Bhéal Feirste
  • Lúnasa 2026: Lá Oiliúna Lasair ar líne 3 – Ar líne
  • Meán Fómhair 2026: Lá Oiliúna Lasair ar líne 4 – Ar líne
  • Deireadh Fómhair 2026: Lá Oiliúna Lasair ar líne 5 – Ar líne
  • 12-14 Samhain 2026: Lá oiliúna deiridh ag Féile Idirnáisiúnta Scannán Chorcaí, agus cur i láthair beo le maoiniú léiriúcháin a mhealladh do thionscadail – Lár Chathair Chorcaí
  1. Ní mór rannpháirtithe a bheith in ann freastal ar iomlán na seisiún oiliúna ar líne agus ar an láthair. 
  2. Le linn an tionscnaimh oiliúna chuimsithigh seo, gheobhaidh rannpháirtithe bunoiliúint lena dtionscadal gearrscannán faisnéise a fhorbairt go cruthaitheach, agus cuimseoidh sé seo ceardlanna, máistir-ranganna, cás-staidéir agus comhráite pearsanta le déantóirí clár faisnéise seanbhunaithe. Reáchtálfar an oiliúint ar fad i dtimpeallacht phearsanta, rud a fhágfaidh go mbeifear in ann leas a bhaint as cur chuige praiticiúil; go n-éascófar an uas-acmhainneacht foghlama agus deiseanna uasta le líonrú a dhéanamh agus caidrimh úra a chothú. 
  3. Cuirfear lóistín ar fáil do suas le beirt rannpháirtithe in aghaidh an tionscadail ag Docs Ireland agus Féile Idirnáisiúnta Scannán Chorcaí. Cuimseofar creidiúnú saor in aisce don dá fhéile fosta. 
  4. Bheadh muid buíoch dá ndéanfá, agus d’iarratas á chur isteach agat, foirm Chomhionannas, Ilchineálacht & Ionchuimsitheacht Lasair a chomhlánú don dá bhall de d’fhoireann chruthaitheach. Is foirm iomlán anaithnid í seo agus úsáidtear í le monatóireacht ilchineálachta a dhéanamh d’Fhéile Idirnáisiúnta Chorcaí agus Docs Ireland. Tá an fhoirm ar fáil i mBéarla agus i nGaeilge. 
  5. Bíonn an fhaisnéis ar fad a sholáthraíonn iarratasóirí faoi rún daingean agus stóráiltear í go slán i gcomhréir le rialacháin RGCS. Ní roinnfear do chuid faisnéise le haon tríú páirtithe. 

Má bhíonn aon cheisteanna agat i dtaca le clár Lasair, iarrtar ort teagmháil a dhéanamh le roisin@docsireland.ie.